Sal Lumen and Spiritus Mundi Philosophici

Je dy que le premier & souverain createur (qui est comme le poinct duquel partent toutes les choses, & l'inepuisable source d'où decoulent cette infinité de ruisseaux,) a une nature qui luy est particuliere; assavoir de produire & conserver tout en l'univers: Car c'est le propre du parfaictement bon autheur de produire & procreer les choses, puis les entretenir & conserver quand il les a creées. De ce premier effect, qui est la creation, le secret en est caché à tous, & ne l'avons que comme en effigie aux generations. Mais le second est ouvert pour le moins aux illuminez, comme esleuz & nez de l'esprit; non pas aux enfans de la chair; afin que ces precieuses marguerites ne soient indignement prostituees aux salles & stupides pourceaux. Or le premier & plus excellent degré de cette conservation a esté fait & enseigné par Jesus-Christ, en la maniere cy devant declaree: lequel a voulu estre imité en toutes choses, s'estant avec un mistere indicible luy mesme donné pour patron de toutes les bonnes œuvres qui se doivent faire au monde. Car la Nature marche tousjours d'un mesme pas sans jamais quitter ses sentiers qu'elle suit exactement en tous ses ouvrages. Ainsi donc que le pere & commun conservateur a pourveu à la commune conservation des la naissance du monde; La Nature a semblablement fait son project des le commencement, & s'est de tout temps employee à ses productions avec une action continuelle. Car tout ainsi qu'il a esté necessaire que tout salut vint d'enhaut pour la conservation de la partie spirituelle de l'homme, il a esté expedient par la mesme necessité que celuy des corps sourdist de la mesme roche; d'autant que des choses basses où est le siege & habitacle de la corruption mortelle ne peuvent proceder salut ny vie. C'est pourquoy le Ciel comme fontaine perpetuelle d'immortalité & perfection va continuellement influant ses vertus sur le corps de la terre, que les Astres benins favorisent de leurs aspects amoureusement pitoyables en consideration des mortels affligez; afin d'engendrer en elle par ces influxions un Esprit immortel & vivifiant, qui prenant corps au sein de cette feconde mere a monstré & dilaté ses vertus par toutes les parties du monde; les departant à chacune creature selon sa portee. Et de là sont procedees les forces particulieres reconnues par leurs effects aux herbes, bestes, pierres, & autres choses qui ont tiré de cet Esprit general, cette infinité de puissantes proprietez, qui font quasi miracle en la conservation de nos corps, & de tous autres.