Sal Lumen and Spiritus Mundi Philosophici

Voila comme le souverain pere de misericorde a pourveu au salut de l'homme, dont le corps conjoint avec l'esprit a pareillement son conservateur que le Ciel a fait naistre au monde, & qui doit estre recherché & descouvert par la lumiere de Nature; estant l'homme pour cet effect doué de ratiocination & jugement, afin de pouvoir cognoistre & comprendre les dons qui luy sont presentez. Mais cet homme qui pour faire une telle recherche avoit esté creé comme celeste, s'est oublié luy mesme, employant plustost ce qu'il avoit de noble & divin en soy à je ne sçay quelles vanitez frivoles & perissables qu'à l'inquisition de l'utile sapience, & solide verité. Bref il a mieux aymé suyvre l'inclination de sa terrestre geniture, que la divine & celeste intelligence, qu'il a laissé croupir en luy, comme une chose indifferente, & qui luy auroit esté casuellement transmise d'en haut. C'est pourquoy de tout temps la race des hommes quasi esteinte avant qu'avoir veu la lumiere: (excepté quelques uns que un Astre favorable a regardez d'un bon œil en naissant,) s'est plus avidement acharnee à la possession des tresors & biens perissables, qu'elle n'a pensé à l'acquisition des celestes dons & precieuses richesses que la bonne mere Nature luy estalle publiquement & en tous lieux, pour le salut & maintien de sa vie: endommagee plustost que secourue par l'abondance qui est communement enveloppee de mortelle corruption. Et se void clairement que les plus spirituels d'entre le vulgaire ayant aucunement entreveu le brillant esclat de ces richesses infinies, ne se sont amusez qu'à leur superficie; delaissant laschement la divine vertu recelee en leur centre. Ce qui a causé tant d'erreurs, non seulement en leur medecine, mais aussi en leur philosophie; qu'elles vont toutes deux rapant & chancelant dans les tenebreuses grottes d'incertitude, pour n'estre guidees d'aucune vive lumiere.