Sal Lumen and Spiritus Mundi Philosophici

Ce qu'a voulu enseigner Hermes, quand il a dit que l'on separe la terre du feu, & pour s'interpreter luy mesme a adjousté ces mots, & le subtil de l'espais. Ce qu'il veut estre fait doucement, & avec grande industrie. Car en parlant de la preparation de l'esprit general du monde apres sa terrification, & par un mesme moyen ouvrant le chemin à celle de tous individus, il a voulu faire entendre qu'en cette terre il y a quelque chose difficile à retenir & garder, assavoir un esprit leger & volatil qui se conserve par le temperament du feu, & qui au contraire s'esvanouiroit facilement avec la partie separable qui abonde tousjours plus, & surmonte en quantité le plus de substance fixe, si l'on ne gouvernoit l'operation avec patiente douceur, & ingenieuse methode. A quoy l'artiste doit observer une maxime importante : c'est la distinction des trois soulfres, dont les deux sont separables, assavoir l'externe qui se perd par la calcination & dissolution ; & l'interne qui disparoist par la seule decoction ; Mais le tiers est celuy que l'on appelle fixe : qui est proprement le vray soulfre de Nature, & le propre subject de la substance, auquel les Philosophes ont donné le nom d'agent, ou grain fix, ou element du feu, en leur compost phisique. Quant à l'externe, c'est le premier volatil & adustible, d'autant qu'il est entierement estranger, & la premiere pasture du feu. L'interne est plus uny & enraciné dans la substance, & partant ne desloge qu'avec plus grande violence & continuation de feu : C'est pourquoy avant son partement il prend toutes couleurs, commençant par la noirceur, qui est la premiere marque de terrestreité, d'adustion, & corruption : & l'avantcourriere de putrefaction & mortification. Puis traversant par les autres moyennes arrive peu à peu à la blancheur, qui est la couleur de l'air, d'où elle monte à la couleur ignee, qui est la rougeur, en laquelle se termine la puissance de l'art, & l'empire du feu : outre laquelle il n'y a plus de progression.