Sal Lumen and Spiritus Mundi Philosophici

C'est pourquoy Arnauld de Villeneufve dit, si tu sçais adoucir l'amer, tu auras tout le magistere. Ce que Brachesco a bien sceu, comme il le tesmoigne en son dialogue intitulé Demogorgon. Pour revenir donc à mon propos, cette douceur cachee ne se peut manifester qu'elle ne soit entierement desveloppee & delivree de ses feces terrestres, & de cette adustion volatile & aeree. Car le terrestre engendre la saveur estrangere : je parle des propres excremens du sel ; de la diversification desquels selon la diversité des especes, & des lieux où ils sont engendrez, provient telle varieté de saveurs ; Car toute saveur est causee par le sel, & plus il y a de sel plus il y a de saveur. D'ailleurs ce qui est aeré & volatil engendre les mauvaises & non naturelles odeurs, qui par l'adustion & inflamation du soufre onctueux & bruslable jette cette puanteur que l'on sent de ce que l'on brusle. Que cette chose volatile soit un excrement il se prouve assez par les puantes fumees des corps bruslans desquels s'engendre la suye atachee aux cheminees & planchers enfumez ; Laquelle retient l'odeur des corps bruslez, & l'amertume des excremens des sels. Et d'abondant se verifie encore par la noirceur & obscurité que cette vapeur imprime en tout ce qu'elle touche, empeschant la plus grande partie de la lumiere & splendeur de Nature, qui desire tousjours la pureté, & se voir separee des tenebres, comme il s'apperçoit en tous corps, desquels les plus parfaits reluisent d'un plus grand lustre, provenant de leur pureté : & les autres demeurent plus ou moins sombres selon leur composition plus ou moins embrouillee de ces impuritez : Ainsi que les metaux parfaits, ou imparfaits : Et les pierres precieuses en donnent ample cognoissance.