Sal Lumen and Spiritus Mundi Philosophici

Mais outre cette corruption qu'ils engendrent, il en provient encore deux inconveniens : l'un est l'empeschement de la penetration ; l'autre celuy de la fixation : Qui sont les deux actions plus necessaires à la conservation de la vie. Car ce qui nourrit & entretient la vie doit necessairement estre une chose subtile pour penetrer les corps par leurs plus simples parties, afin de renforcer, & substanter, comme une huille secrette, la lumiere de la vie cachee au centre des corps. Que si elle estoit grossiere elle oppileroit, suffoqueroit, voire estouperoit plustost que d'entrer par voyes si delicates & desliees. D'autre part ce qui tient & maintient la vie en estre, doit aussi par raison estre quelque chose de stable & non fuyante. Que si elle estoit volatile, la mort à chacun moment entreroit en nous, introduitte par la corruption qu'engendre la feculente adustion qui continuellement afflige nostre vie. La terreistreité empesche donc l'ingression, & l'adustion empesche la fixation & stabilité. De cecy peut estre tiré un salutaire advis pour la Medecine ; assavoir que tout vray medicament qui est pris interieurement pour restaurer la vie debilitee par maladie, & dechasser la cause de la mort prochaine, doit avoir deux proprietez, sçavoir est de promptement penetrer jusques au centre de la santé, & conserver ce centre, en le dilatant & ramenant par tout le corps. Ce que les anciens ont jadis pratiqué avec heureux & glorieux succés. Et depuis quelque temps ce trop aboyé & envié Paracelse ; qui reprenant leurs traces a descouvert à sa posterité ce que tant de siecles emmoncelez l'un sur l'autre tenoient enseveli. Face & die qui voudra le contraire : mais j'ose affirmer que sans les operations du feu rien ne peut estre conduit à pureté, ny fixation, qui sont deux parties qu'on doit sur tout rechercher & introduire en tous medicaments.