Sal Lumen and Spiritus Mundi Philosophici

Surquoy je poseray ce fondement, sçavoir est qu'il n'y a que deux choses par lesquelles toutes separations s'accomplissent, qui sont le feu & l'eau. Et qu'il n'y a que deux choses separables en tous corps, dont l'une se divise par le feu, & l'autre par l'eau. On doit en premier lieu tenir pour chose indubitable que la nature du feu est de consommer & destruire tout ce qui est bruslable : Et celle de l'eau de laver & nettoyer la substance des ordures qui la souillent. Le feu devore tout ce qui est volatil & de la qualité aeree ; parce que c'est sa propre pasture. L'eau divise tout ce qui est terrestre & grossier. Il faut donc qu'entre ses deux extremes il y ait quelque moyenne disposition qui doive estre sauvee & guarantie, n'ayant en soy ny feces ny adustion qui la soubmetent au pouvoir de ces deux expugnateurs. Parquoy c'est chose tres-claire que l'adustion & les feces sont les deux corrupteurs & destructeurs de toutes choses. Ce que le divin Hipocrate avoit bien recognu quand il a dit que toutes maladies viennent de l'air, ou des aliments. Voulant dire que l'excez des viandes pleines d'excremens, & l'air facile à recevoir corruption, & qui facilement corrompt & enflame les excremens par un feu excedant celuy de Nature ; sont causes de toutes les maladies. Car l'excrement des viandes emplit les corps de terrestres impuretez ; Et l'air inflamable est ce qui y engendre la matiere soufreuse & adustible : laquelle aysément concevant l'ardeur, consomme aussi avec elle ce qui est de vital & radical, emporté par la plus grande quantité de ce qui est volatil & bruslable. Les feces terrestres & l'adustion sont donc les deux autheurs de corruption, & ce qui empesche en toutes choses la vigueur des actions substantielles. Que si nous en desirons des preuves familieres, les puanteurs que la digestion & les excrements rendent, nous en assouviront trop. Car ce qui sent mal aux choses que l'on brusle, monstre bien que ce n'est rien de bon. De mesme est il des puantes fumees des excremens sortant des corps, lesquelles proviennent de la corruption.