Sal Lumen and Spiritus Mundi Philosophici

On pourra donc recueillir de ce qui a ja esté dit qu'il n'est rien vuide d'excremens : & que excrement & substance sont les deux parties dont tous corps sont composez : & que rien sinon le seul excrement ne doit aussi estre separé du subject, comme accidentel, & qui n'a nulle afinité avec l'essence de la substance. On pourra semblablement recueillir que le feu est celuy qui seul procure & facilite cette separation. Mais il est temps de dire comment cela se fait, car ce n'est pas assez de proposer que la separation est le commencement des œuvres tant de la Nature que de l'art, ny de sçavoir qu'elles choses sont separables, si l'on ne sçait comment cela doit estre pratiqué. J'ay cy devant dit qu'il y a deux especes de separation, L'une qui se fait par distinction & ornement, de laquelle je me tairay maintenant d'autant qu'elle appartient à la seule nature, & non à l'art. L'autre qui se fait par division ou retrenchement des parties : qui est celle dont je desire esclaircir la practique. J'ay n'aguere dit que toutes choses visibles & palpables sont composees de ces deux parties contraires, excrement & substance. Quant à la substance, elle est de soy simple & indivisible, soit qu'on la prenne generalement pour la premiere matiere de tout, ou bien pour les especes particulieres, selon l'impression de l'idee ou forme celeste qui est insinuee. C'est à dire qu'au limbe de l'univers, ou bien en chacune espece des corps composez, cette substance est une en essence, vertu, & qualité. Et ne peut on dire qu'en un mesme subject il y ait une partie d'icelle d'une sorte, & l'autre d'une autre : mais il n'est pas ainsi de l'excrement.