Sal Lumen and Spiritus Mundi Philosophici

Or d’autant que de cette separation universelle, ce qui estoit plus igné & subtil choisit le haut pour son siege; & ce qui estoit grossier & massif devala bas pour s’y reposer, il advint que les corps celestes esloignez & separez de toutes feces immondes resterent immortels, s’estendant en rondeur, tant parce qu’ils s’esleverent d’un mesme vol dés le commencement, qu’à cause que le naturel des choses eternelles desire la forme ronde, qui est la seule forme indeficiente & accomplie. Il advint d’autre part que les grossieres & terrestres demeurerent subjectes à corruption & à mort, pource qu’en la corruption se joignit un assemblement de choses contraires, sçavoir est des elements differents en qualitez, comme chaleur avec froideur & moiteur avec seicheresse. A quoy se mesla aussi la commixtion de ces feces impures qui estoient proprement la lie de la premiere matiere universelle, qui d’elle mesme ne fut pas creée pure comme imaginent quelques uns, car tout ce qui en seroit sorty & sortiroit encore n’eust onc esté asservy à la mort. Et qui plus est, aucune generation ne pourroit estre faite au monde inferieur, n'y ayant point d'alteration ny mutation des formes, qui n'auroient toutes qu'une mesme face : sans distinction de haut ny de bas. Les choses demeureroient esgallement pures & subtiles, & par consequent privees d'ornement : Voire à parler franchement il n'auroit esté fait aucune creation de la matiere ny du monde. Ce fut donc chose necessaire d'entremesler ces feces grossieres à la substance subtile : Car où il n'y a que pureté il n'y peut avoir d'action, parce que rien ne peut agir sans patient : le pur n'ayant nul empire sur son semblable, ny l'impur sur son pareil. Or la Nature qui est en continuelle action pour separer le pur d'avec l'impur, à la conservation de l'essence & accroissement de la vie, a pour son unique subject cette substance entremeslee d'impuritez, laquelle retenant tousjours l'estat & le naturel de sa premiere creation, ne se nourrit, multiplie, & accroist, qu'avec nourriture multiplication, & accroissement de feces, qui luy sont non pas consubstantielles, mais compagnes de naissance, ou sœur uterines. Qu'ainsi ne soit, ceux qui ont par divine inspiration trouvé le moyen d'extraire cette premiere matiere, & de la corporifier à l'imitation de nature, sçavent par experience que quelque pureté, neteté, & clairté qu'elle semble avoir, si est elle accompagnee de force immondicitez terrestres, qui s'en tirent avec grande industrie.