Sal Lumen and Spiritus Mundi Philosophici

Et de l’amas des feces qui s’assemblerent en bas autour du centre, se forma la terre pourveue de la vraye substance: mais confuse dans l’espaisseur grossiere d’icelle, apres que Phœbus eut tué le monstrueux Pithon, enflé de l’humeur veneneuse qui s’estoit engendree parmy le limon terrestre. C’est à dire qu’apres que le sec inné eut beu l’humidité superflue par l’operation de la chaleur naturelle, la terre commença de sentir les actions de cette substance cachee dans son sein. Laquelle substance est cette matiere spiritueuse non jamais oisive, mais incessamment empeschee à engendrer & vivifier. Laquelle proprement doit estre en cet endroict appellee terre, parce qu’elle est vrayement la propre & vertueuse substance de la terre, & celle seule qui engendre tous corps par sa propre corporification, selon les idees des individus. Ce qu’autrefois j’ay despeint en l’Ode Pindarique dediee au grand Duc d’Allençon mon tres-honoré seigneur & maistre: de laquelle je rapporteray icy quelques vers à ce propos.