Sal Lumen and Spiritus Mundi Philosophici

C’est pourquoy apres leur seconde nativité elles demeurent libres en leurs forces & actions, qui paravant estoient enfouyes dans la masse excrementeuse, & ne pouvoient exercer les fonctions vitales dont le Ciel par sa benigne influence les avoit enrichis, ne plus ne moins que l’homme estant encore emprisonné dans la chartre du vieil Adam ne peut produire aucun acte louable & vertueux. Mais avant que m’embarquer davantage à desduire la practique de ces choses, je reprendray l’ordre encommencé: assavoir qu’ayant diffiny la separation & combien il en est d’especes, je declareray maintenant qu’elles sont, & d’où procedent les choses qui doivent estre separees: & de qui vient la vertu separative. J’ay suffisamment adverti les curieux qu’en tout corps il y a deux parties, l’une est l’excrement, & l’autre est la substance. L’une qui est essentielle, l’autre qui est accidentelle. Or la substance simplement consideree comme j’ay dit, est toute pure & sans corruption aucune: l’excrement au contraire totallement impur se meslant avec la substance est ce qui la gaste & pervertit sa pureté. La generation & formation de la substance a esté suffisamment esclaircie aux deux premiers chapitres de ce deuxiesme livre. Il reste maintenant à deschiffrer l’estre & les qualitez des excrements. Surquoy j’infere de ce qui a ja esté dit, que rien ne se doit separer sinon les excrements, posant ce fondement qu’il n’est rien au monde soubs-lunaire entre les choses passibles, qui soit vuide d’excremens. Car lors que Dieu separa les parties du monde, il se feit un ravalement & affaissement de ce qui estoit plus grossier en la matiere premiere, comme plus pesant & moins subtil.