Sal Lumen and Spiritus Mundi Philosophici

Laquelle est enervee, tant par le vuide qu’elle abhorre sur tout; que par le violent mouvement qui se fait en telles purgations, tendant plustost à tuer qu’à guarir. Laquelle violence de mouvement elle ne deteste moins que le vuide; car elle est impatiente aux assauts de ces deux ennemis jurez à sa destruction. Parquoy, la medecine vulgaire ne guarist guere les maladies obstinees avec ses drogues communes preparees à l’ordinaire. Que si quelqu’un entre plusieurs est guary, cela n’advient par les pilules, bolus, ou breuvages; Mais par la vertu de Nature qui est encore suffisante pour vaincre l’impure quantité meslee en tels remedes, & faire son profit de leur peu de substance. Ou bien que la force venefique de ces choses excrementeuses & corrompantes, poussee & rejectee par la Nature vigoureuse, attire & entraisne avec soy quelque portion de l’humeur peccante qui luy ressemble, & ce par attraction & simpathie. Ainsi tel medicament estrange travaillant le corps esmeut la Nature, qui pareillement troublee, & voulant resister à cet ennemy, rejecte & combat violemment ce qui luy est nuisible & dommageable. S’il faut que tout medicament soit convenable & non contraire à la Nature, il faut necessairement qu’il soit repurgé de tous ces venins, qu’il n’a receu que de la masse excrementeuse & corruptible. C’est pourquoy le vray medecin doit premierement choisir les choses qui plus conviennent & simpathisent au corps humain; & les purger de leurs impuritez: ou bien qui ayent naturellement en elles une generalle vertu & purification innee & cachee en leur interieur. Laquelle purification ne se peut autrement faire que par la destruction & separation de l’impur nuisible; & la restauration du pur qui estoit suffoqué par les immondices. Mais parce que ce n’est point ma profession d’exercer la medecine, ny mon dessein d’en traicter icy davantage; n’en ayant dit ce peu que pour me desgager du destroit où le vent de l’occasion m’avoit lancé; je reprendray ma routte: & diray que puisqu’il n’y a rien aux choses basses qui ne soit infecté, enveloppé, & comme ensevely dans la corruption des excrements & feces qui engendrent mortification, & empeschent la liberté de la legitime substance, & de ses actions; il a fallu que par necessité Nature ait pratiqué le remede des separations, qui se font par division & retranchement du pur d’avec l’impur, du subtil d’avec le grossier, & du salutaire d’avec le destruisant.