Sal Lumen and Spiritus Mundi Philosophici

Car la chose impure qui enveloppe le pur de la substance & se mesle parmy, ne cesse de la quereller & combattre jusqu’à ce qu’elle l’aye surmontee & suffoquee, donnant entree & accès à la corruption mortelle qui ne s’attache jamais aux choses simples & pures, ains seulement aux ordes & composees. Toute substance donc est simple & pure de soy mesme, & par consequent non subjecte à corruption ny à mort: comme nous le voyons aux choses superieures esloignees de tous excrements. Mais les inferieures ne sont pas ainsi, car elles habitent au milieu des lies impures du monde desquelles le naturel est de destruire & mortifier: comme celuy de la pureté est de vivifier & conserver. Les corruptions & mortifications viennent és hommes par les lies du monde, dans lesquelles ils vivent une courte & penible vie plaine d’ennuis & de languissantes maladies, ne plus ne moins qu’un criminel enclos dedans une orde & obscure chartre, où il transist entre la mort & l’esperance, parmy l’infection & la vermine, repeu du rebut des viandes gastees & mal nettes. Car tous aliments sont impurs, & portent avec eux les bourreaux de la vie, assavoir les venins cachez desquels en fin la mort nous assassine en trahison par nos propres mains, & de nostre consentement; n’ayant en eux qu’une si petite quantité de substance vivifiante & nourrissante, & encore si fort embarrassee & infectee des excrements, que la digestion de l’estomach la peut malaisément attirer seule.