Sal Lumen and Spiritus Mundi Philosophici

Considerant donc que ce qu’il vouloit faire estoit une chose tres-parfaicte, & que pour parvenir à telle perfection il falloit commencer par les choses basses & encore grossieres, c’est à dire par la separation de ce qui estoit superflu & nuisible à son œuvre: il voulut premierement diviser les Natures contraires, pour eviter la ruyne d’icelle. En quoy veritablement on peut dire qu’il prit l’oyseau par le pied, suyvant l’adage: & feit son entree par la vraye porte & allee qui conduit droictement au cabinet des secrets de Nature. Car separation est le commencement de toutes choses, & la premiere operation qui distingua les membres confus du corps universel. Par la division des diformes amas du cahos commença premierement à s’esclaircir & arranger l’ordre & forme des elements: car sans cette separation le jour & la nuit, le Soleil & la Lune, l’Hiver & l’Esté, seroient encore une mesme chose à present: Les Metaux, & mineraux tant diversifiez, n’auroient qu’un mesme corps: Et tous les vegetaux une mesme semence. Il fut donc necessaire que Nature commençast ce bel ordre & distinction que nous voyons embellir l’univers par l’œuvre de la separation. Mais descendant aux choses particulieres, considerons que cette sçavante ouvriere commence par là tous ses labeurs. Les generations ne se commencent ny achevent que par separation: & par separation les aliments augmentent & maintiennent tous corps. Que si je voulois m’estendre en la preuve de cette verité par chacune des especes, je m’envelopperois en la confusion du mesme Cahos d’où je ne sortirois jamais pour l’infinité des exemples qui s’offriroient à moy. Je poseray donc ce premier fondement, que nature commence toutes ses besongnes par la separation.