Sal Lumen and Spiritus Mundi Philosophici

La nature tres-sage ouvriere nous enseigne par ses operations propres que nous devons en toutes choses considerer la fin où nous desirons parvenir; & par où nous devons commencer nos ouvrages. Pour cette cause le prudent inquisiteur des secrets naturels doit avoir vraye cognoissance des principes, progrez, & qualitez, tant internes qu’externes de la matiere; afin que pretendant accomplir quelque excellent œuvre il ne confonde la fin avec le commencement, & par regimes fantastiques & sentiers inconus il ne s’esgare & s’esloigne du grand, plain, & droit chemin que Nature à tracé dés le premier project & fondement du monde. Le divin Hermes à bien sceu tenir cette voye par la cognoissance parfaite qu’il avoit de la constitution de l’univers: & voulant par Art ensuivre les vestiges & traces naturelles s’imagina tres-prudemment que la terre est le principe de toutes choses: & la premiere qui fut creée par separation dedans le ventre du cahos. C’est pourquoy il entra ainsi discretement au sacraire des arcanes naturels par la terrification de cette matiere premiere, que j’ay dit cydevant estre nourrie dans la matrice de la terre. Mais comme ce n’est pas assez à un Architecte d’avoir les materiaux d’un edifice, s’il n’a la science de bastir & les mettre en œuvre: Hermes ne se contenta pas aussi d’estre pourveu de la matiere convenable, mais il rechercha & apprit soigneusement les moyens de la mettre en œuvre, à l’imitation du grand Phisicien en la confection du monde: creant d’icelle un petit monde auquel il sceut enclore toutes les vertus du grand, duquel, & sur le patron duquel il l’auroit pris & façonné.