Sal Lumen and Spiritus Mundi Philosophici

Puis donc que cette matiere de son propre naturel & desir tend à se corporifier, qui pourra dire avec raison vallable qu’en se corporifiant nature la despoüille & prive des vertus mesmes qui causent sa corporification? Et puisque venant à prendre corps elle se convertit premierement & prochainement en terre; Qui voudra nier que cette terre ne soit doüee de ses mesmes vertus? Car jaçoit qu’à cause de la commixtion & concurrance des elements elle ayt quelques impuritez, si est-ce qu’en son profond elle est tousjours tres-pure: de sorte qu’apres sa purification le plus puissant & actif de tous les elements, qui est le feu, n’y a plus de puissance destructive, car elle le surpasse en perfection & subtilité. C’est pourquoy elle penetre si promptement tous corps: les vivifiant & augmentant en force: restaurant & conservant en eux ce qu’elle y trouve estre de sa nature, assavoir l’humide radical: que par sa subtilité ignee elle purge & separe des excremens qui l’enveloppent & taschent à le suffoquer. C’est en un mot cette excellente medecine que Salomon dit estre tiree de la terre, & que l’homme prudent ne desdaignera point. C’est encore le sel precieux auquel ce grand Docteur des Docteurs compara ses Apostres, comme au tresor plus exquis que les Cieux ayent produit. Car il eust aussi tost dit vous estes les diamans, les rubis, les perles, l’or ou l’argent de la terre, s’il n’eust bien sceu que toutes ces choses, quoy qu’admirables, n’ont rien en elles de comparable à ce sel general: auquel seul elles doivent l’hommage de leur glorieuse perfection.