Sal Lumen and Spiritus Mundi Philosophici

La naturelle est celle qui est innee en eux, & leur fut donnee dés la creation, qui est ce gouvernement de l’univers dont parle Hermes au Pimandre, par lequel ils l’entretiennent en son estre, le gardant & conservant par leurs vertus de destruction, decadence, & aneantissement des vertus de cette influence, dont l’Esprit de l’univers est incessamment fourny & doüé, comme nous voyons: lequel les applique & fait voir en toutes choses ausquelles il donne accroissement & subsistance. Mais l’accidentelle est celle qui leur survient outre leur nature par les occurrances de leurs situations & regards: Et celle cy change à toute heure, de sorte qu’elle n’est jamais semblable: & n’a puissance que sur les effects de la matiere, & non sur la matiere mesme. Car quelque maligne influence qui arrive, nous voyons que la terre en son centre ne laisse pas à deuëment faire ses operations, & sans cesse produire animaux, vegetaux, & mineraux. Que s’il arrive quelquefois des mortifications, cela procedde seulement de la malice de l’aspect qui ne touche que la superficie des corps, c’est à dire la masse excrementeuse, & non pas la substance interieure, qui est la chose mesme. Et de vray cet accident se change: tellement que cette influxion opere tantost une chose, & tantost une autre toute contraire: Ce que ne fait jamais la naturelle & principalle, qui demeure fixe & permanente en son poinct. De là se doit tirer une conclusion que la matiere premiere comme simple de soy ne reçoit sinon les vertus celestes, qu’elle reçoit & garde encore en sa terrification.