Sal Lumen and Spiritus Mundi Philosophici

Ce qui ne se peut faire que l’augmentation ne s’en ensuive, avec la conservation & restauration: L’une par l’indeficient entretien de la vie; l’autre par le refournissement infiny de ce qui s’employe & depart aux generations des especes: comme il se void appertement en cette premiere matiere corporifiee: laquelle engrossie par l’impregnation celeste se nourrit, multiplie & accroist de soy mesme, par une vive source d’aliment & accroissance qui flue inepuisable. Qui est la cause qu’elle est nommee dragon ou serpent luxuriant en soy mesme: Tousjours renaissant & germinant comme les vegetables, en quelque lieu qu’il soit. De sorte que tout endroict & place qui en aura esté une fois peuplee, n’en sera jamais despourveue, quelque lavement ou bruslement que l’on en puisse faire. Et voyla certainement une des marques plus insignes avec laquelle on puisse discerner cette matiere premiere. Ce sont donc icy les principales vertus que cet esprit universel receut des influences celestes dés le commencement du monde, & recevra jusqu’à la fin: produisant tousjours des effects merveilleux en tous les membres de ce grand corps universel. Mais on me pourroit demander pourquoy cette premiere matiere que j’ay dit avoir receu du Ciel tant de pures & vertueuses influences, est ordinairement trouvee farcie de tant de vicieuses qualitez? & comment les retient elle apres les avoir receuës, veu qu’elle est sans cesse en besongne aux actions de separation, vivification, augmentation, conservation, & restauration: car si elle ne separe, il est necessaire qu’elle mortifie. Et si elle n’augmente, conserve & restaure, il faut bien qu’elle diminue, destruise, & affoiblisse: ce qu’à vray dire elle ne fait jamais. Je respondray que les Astres ont double influence; L’une naturelle, L’autre accidentelle.