Sal Lumen and Spiritus Mundi Philosophici

Nos Theologiens veulent aussi qu'en ce mesme lieu soient les enfers, & les tourmens des ames: se persuadant qu'estant bien veritable que les influences de tous les astres qui sont de nature ignee y tombent, il y doive avoir une ardeur incroyable. L'on peut sans doute appeller ce lieu infernal, puis qu'il n'y a rien de plus bas: Mais que les ames y soient tourmentees par ce feu, & que l'ardeur d'iceluy soit ou puisse estre telle qu'ils disent, cela semble esloigné de la raison, & des vrays axiomes de Philosophie. Car, outre que les ames n'occupent aucun lieu, par leur confession mesme, & que leur naturel apres qu'elles ont quitté le fardeau de leurs corps est de tendre & se porter en haut, à cause de leur legereté spirituelle, qui tient plus de la qualité ignee que de toute autre; elles ne peuvent qu'avec violence, ny comme legeres estre demergees en ce lieu sousterrain, ny comme simples patir l'action du feu qui n'a point d'empire sur son semblable. Pourquoy veulent-ils donc qu'elles descendent en ce lieu pour y estre tourmentees? si ce n'est que le pesant fardeau du peché dont elles sont enveloppees, deprimant leur naturel les porte en bas & face descendre au centre de la terre: & que le mesme peché encore s'estant emparé & comme incorporé avec elles il se face je ne sçay quelle composition qui les rende passibles & subjectes, non à l'action simple & naturelle de ce feu, mais peut estre à la violence d'un autre feu creé de Dieu à cet effect: & peut estre de ce feu mesme dont nous parlons, son action luy estant redoublee par une secrette & vertu divine: ce qui est fort probable, & semble estre authorisé de l'escriture saincte: Toutefois je ne veux temerairement faire opinion à part; non plus que m'escarter de la foy orthodoxe; au soustien de laquelle j'ay de long temps voué ma vie, & le peu d'industrie que je tiens du Ciel.