Sal Lumen and Spiritus Mundi Philosophici

Bien que cet Esprit soit infus & resident tant és choses inferieures que superieures, toutesfois on le peult plus evidemment & facilement voir & connoistre au corps plus proche. Or le plus proche & vegeteux de tous les corps c'est celuy de la terre. En elle donc il s'engendre & manifeste davantage, non sans grande raison: car la terre est comme le blanc & la butte de toutes les celestes influstions & vertus superieures, en laquelle tous les astres descochent & lancent leurs rayons. Elle est aussi le fondement & baze de tous les elements, contenant en soy les semences & vertus seminales de toutes choses, qui est cause qu'on la nomme Mere commune des animaux, vegetaux, & mineraux. Estant donc engrossie par les cieux & les autres Elements, elle produit de son sein toutes choses. Or que d'icelle on arrache cet Esprit; qu'on le lave; qu'on le separe tant que l'on voudra; si on laisse cette terre ainsi despouillee quelque temps à l'air, elle sera r'engrossie & impregnee comme devant par les vertus & forces du ciel, produisant derechef certaines pierrettes cristallines, & reluysantes estincelles: & cet Esprit que l'on pensera en estre du tout separé, regermera tousjours. Parquoy l'impregnation faite par l'action des cieux & des qualitez premieres la rend continuellement generante, car d'elle provient tout ce qui est dessous le cercle de la Lune.