Sal Lumen and Spiritus Mundi Philosophici

Pour empescher que l'on ne se deçoyve icy, il fault considerer que comme nous avons corps, esprit, & ame; aussi a ce grand univers. Desquelles trois parties ne se trouvant aucune chose qui en soit despourveuë, c'est une consequence necessaire qu'elles sont tousjours associees ensemble; de sorte que l'une n'est jamais sans l'autre, que si quelquefois il semble que les deux en soient separees, elles sont toutes-fois cachees en la tierce qui reste; comme le subtil & profond artiste sçaura bien cognoistre, & voir en chacun corps par l'examen du feu. Ce qui donc est matiere est aussi esprit: & ce qui est esprit peut sans impertinence estre appellé corps, eu esgard à ce qu'ils sont indivisibles & engendrez par la loy de Nature pour n'estre qu'une seule & mesme chose; parquoy la matiere n'est point seulement corps, ame ou esprit, mais elle est tous les trois ensemble, l'un avec l'autre engendrez & nourris, tellement qu'à la propagation & action de l'un, les deux autres se trouvent.