Sal Lumen and Spiritus Mundi Philosophici

Que si elle est extraite du sein de sa mere nourrisse, puis repurgee de toutes superfluitez accidentelles, & preparee selon l'art: Qui l'empeschera de separer des corps, auxquels elle sera administree, les choses corrompantes qui luy sont dissemblables; & de conserver & multiplier ce qui luy est conforme? veu que toutes les forces celestes & vertus mondaines y concurrent ensemble. Il est certain que les auteurs mal interpretez semblent tous commander ou conseiller que l'on use des metaux seuls pour faire les metaux: disant qu'en l'or seul sont les semences de l'or. Sentence, voire Arrest sans appel. Mais outre ce que j'ay desia dit n'aguere de la difference des metaux vulgaires, & de ceux qu'ils entendent que l'on prenne pour leur magistere; encore prendrai-je l'audace d'affirmer que sans cet Esprit general qui est la seule cause de vegetation en toutes choses, cette faculté d'aurifier ou d'argentifier qui est en ces corps metalliques tant vulgaires que secrets & occultes, ne pourroit vegeter ny venir de puissance en effect; d'autant que la nature ne se produict point soy mesme; & qu'en toute operation il faut un agent & une matiere capable de son action; & c'est ce feu dont parle Pontanus, que les sages ont tous caché comme la seule clef de leurs secrets, sans lequel il a failly deux cent foys (dit il) en l'operation sur la vraye matiere.