Sal Lumen and Spiritus Mundi Philosophici

Les choses sont nourries de ce dont elles sont faites. Il se voit que tout respire, vit, croist, & se nourrit par cet esprit infus au monde: & se dissout & meurt iceluy defaillant. Il s'ensuit donc que tout est fait de luy, qui n'est autre chose qu'une simple essence subtile, que les philosophes nomment quinte, parce qu'elle peut estre separee des corps comme d'une matiere crasse & grossiere, & de la superfluité des quatre elemens: & lors elle a des operations merveilleuses. Or elle est infuse par toutes les parties du monde, & par elle la vertu de l'ame se dilate & devient vigoureuse: Laquelle vertu est principalement versee & donnee aux corps qui ont plus attiré & participé de cet Esprit, estant envoyee & decoulee d'enhaut, c'est à sçavoir du Soleil, qui veritablement produit la qualité de la matiere en essence: Tellement que cet esprit eschauffé par l'action du Soleil, acquiert grande abondance de vie, multipliant & vivifiant les semences de toutes choses, qui croissent & augmentent jusques à la magnitude determinee, selon l'espece & forme de la chose. Pour cette cause Virgile a veritablement dit Qu'une vigueur ignee & celeste origine Est en chaque semence, & en elle domine.