Sal Lumen and Spiritus Mundi Philosophici

Mais apres que Jason eut accomply ses labeurs, il luy fallut encore endormir le dragon veillant qui gardoit la toison d’Or; & l’assoupir de sorte que de son gosier ne sortit plus ny feu ny fumee. Ce qu’il feit, en le noyant dans les eaux Stigiennes: c’est à dire, en le redissolvant & refixant avec son esprit. Il ne restoit donc plus à Jason pour posseder la toison d’Or, & rajeunir son pere Æson agravé de vieillesse extreme, sinon un seul labeur que Medée luy enseigna pour couronner ses bons offices: c’estoit la fermentation & conjonction du beurre du Soleil avec la paste de ce Mercure preparé; qui de soy n’est capable de produire deux si excellents effects: n’estant à vray dire, que la terre où l’on doit semer le pur froment que Nature a produit & conduit à la perfection qui luy est concedee. Par ce dernier labeur il se veid enfin maistre de ce double tresor, qu’il emporta glorieusement au lieu de sa naissance: avec lequel il se combla de richesses, & son vieil pere de vigoureuse santé: banissant de luy les importunes langueurs que traisne apres soy le long age. Je laisseray donc maintenant Jason & sa Medée jouir de leur felicité, & diray seulement que rien ne pourroit estre exprimé par ce dragon veillant & jettant le feu par la gorge, plus proprement que nostre esprit ou Mercure, qui est la chose du monde la plus vive & inflammable: Estant à cette occasion appellé eau ardante, ou de vie, parce comme dit Bracesco qu’elle ard soudainement avant sa coagulation, & n’est pas eau de vigne ains de vie, à cause qu’elle vivifie tout. Que si on le contemple en son aparente superficie, qui pensera jamais qu’il y ayt en luy quelque chose de fixe & non consomptible, veu que si legerement il s’alume & s’esvanouit au moindre attouchement du feu? Ny qu’il y eust en son centre une vertu conservatrice de la vie, monstrant evidemment qu’il est tout enveloppé de mortel venin, destruisant plustost que vivifiant?