Sal Lumen and Spiritus Mundi Philosophici

Saturne, fils de Cœlie & de Vesta, (qui sont le Ciel & la Terre) & mary d’Opis sa sœur, (qui est cette vertu aydante & conservatrice de tout) represente le mesme Demogorgon. Car ses enfans qu’il devore & puis les revomit, sont-ce pas les corps ausquels il a donné l’estre en chacun des trois genres, lesquels en leur fin se reduisent en luy, pour en reproduire de nouveaux: afin que par cette perpetuelle vicissitude, l’ordre estably dés la creation du monde, puisse à jamais s’entretenir & conserver? On le peint chenu & sordide: la teste couverte: la main armee d’une faux: & pour sa devise on luy donne un serpent qui se recourbant en figure circulaire, mord sa queuë. Il est veritablement tres-vieil, puis qu’il est principe de tout: Il a les cheveux & la barbe blanche, qui luy vont croissant comme il se void en maint endroit, ne plus ne moins que font les choses germinantes. Il est sordide & mal propre de luy mesme, à cause de la terrestre immondicité qui se joint à luy, pleine d’adustion sulphuree & corrompante. Sa teste est couverte; C’est à dire que le chef de sa perfection est caché soubs le voille de son impurité, qui le rend incognu de plusieurs; joint la difficulté de son obscure recherche. Sa faux, est la mordante poncticité dont il tranche & devore tout. Et le serpent qui mord sa queue, est sa vertu & nature regenerante, par laquelle il se refournit & r’engendre luy mesme ainsi que l’on dit du Phœnix: à cause dequoy on luy donne quelquefois ce nom. De sorte qu’il est tousjours comme en ronde & indeficiente croissance, rampant par la terre à la façon des serpents. J’entens desja quelqu’un me relever, & dire que c’est bien mal conceu à moy l’intention des inventeurs de cette fabuleuse description de Saturne, qu’ils ont pris pour le plomb. D’autant que selon les escrits de tous les sçavants en la generation des metaux, c’est le plus ancien & premier né de tous; par la naturelle congelation du Mercure és veines des rochers. Lequel devore tous les autres à cause de sa crudité qui le rend abondant en Sel; car c’est du Sel que luy provient cette mordante & devorante action; comme il s’esprouve assez par les coupelles des affineurs, où il revomit l’Or & l’Argent, qu’il a bien eu puissance d’engloutir, mais non de consommer & destruire; parce qu’en leur decoction ils ont acquis une fermeté & fixation capable de resister à la debile chaleur de son estomach avide. Je ne reprouve entierement ce sens, d’autant qu’il est conforme en quelques points à la description susdite; mais ne l’estant pas en tous comme est celuy que j’ay deschiffré, je me persuade que si nous passons par le jugement des experts, le dementy ne sera point pour moy.