Sal Lumen and Spiritus Mundi Philosophici

Ce qu'a voulu signifier Hermes en l'un de ses traictez par l'oyseau plumeux qui est retenu par l'oyseau sans plumes. Et Nicolas Flamel par les deux dragons l'un garny d'aisles, & l'autre non, qu'il a fait representer, en l'une des arches du cimetiere de S. Innocent à Paris. Et dans un autre tableau de pierre à costé du grand Autel de l'Eglise de saincte Geneviefve des ardans, qu'il a fait bastir. Mais sans nous esgarer dans les destours de ces dedalles; voyons nous pas que tous les vegetables ne cessent de croistre & monter en l'air par la force de cet esprit volatil, lequel (comme j'ay dit au premier livre) les esleveroit encore davantage pour le desir qu'il a de retourner au lieu d'où il est party, s'ils n'estoient contretenus & arrestez par leur propre terre & masse corporelle, en laquelle est caché je ne sçay quoy de fixe. Or pour n'estre accusé de contradiction par quelques uns non encore usitez aux termes communs de nos maistres, je me veux expliquer, en les advertissant que je n'entens nullement que cette spiritualité volatile soit ce que j'ay cy devant appellé souphre volatil & separable, qui est l'un des autheurs de corruption: Mais seulement la plus simple partie de cette vapeur primeraine, qui ne perd jamais son interne subtilité & acuité, dont le naturel est de s'eslever & tendre à la perfection. Car sublimer proprement selon le vray sens des Philosophes n'est autre chose que de parfaire, & d'exalter les matieres d'imperfection à perfection. Tout ainsi donc que ce Mercure a sa substance eslevable; aussi a il sa substance fixable. Quant à la premiere elle luy est innee d'elle mesme: Mais quant à la seconde encore qu'il l'ait en son centre (c'est à dire en puissance) elle ne peut toutesfois sortir en effect sinon par le secours de l'art.