Sal Lumen and Spiritus Mundi Philosophici

Cet inconvenient m'arriva une fois en la calcination du Cristal commun, que voulant purger de ses excrements pour le reduire en vraye essence par une longue ignition, je trouvay entierement vitrifié avec ses feces, & partant inutile à mon dessein, & à tout autre ouvrage. Car encore que le Cristal paroisse clair, lucide, & transparent, les premieres fumees noires, puis violettes qui se presentent en sa calcination, avec une odeur puante & sulfuree, tesmoignent bien sa terrestreité excrementeuse : tout ainsi que les blanches qui les suivent sont indices vrais de l'homogeneité de la substance, qui demeure en fin claire & flotante en petite quantité, tant qu'elle soit parvenue à la Nature & consistance de pur sel cristallin : & durant ces reiterations dernieres l'odeur ingrate qui se sent és premieres se change en une tres-souefve & plaisante, semblable à la poudre de violette. Or de la reiteration des calcinations outre les choses predittes arrivent deux biens : L'un, que la chose calcinee acquiert par l'accoustumance du feu cette subtilité & permanence aux medicamens desquelles j'ay desja parlé : L'autre, que ce qui est souvent dissoult acquiert penetration, ingression prompte & subtile, & puissante vertu de transmuer l'estat du patient, de maladie à santé, de langueur à vigueur, de destruction à restauration & parfaict amandement. Voyla les voyes ordinaires de toutes separations qui ne tendent à autre but qu'à sequestrer les pures substances de leurs excrements corrompants, & les eslever de la lourde espaisseur terrestre à la pureté ignee : & bref d'imperfection à perfection.