Sal Lumen and Spiritus Mundi Philosophici

Mais d'autant que la composition des choses est diverse, & que les unes cedent plus difficilement que les autres, il a pareillement esté besoin de diversifier les actions de ces deux, sans toutesfois s'esgarer ny escarter du plain chemin de la Nature. Car aux uns l'adustion & soulfre onctueux inflamable & infectant, a voulu estre ostée d'une sorte, & aux autres la terrestre feculence d'une autre. La calcination a esté inventee avec la sublimation, pour purger l'adustion. Et pour la terrestre feculence la distillation & dissolution ont esté mises en usage. L'on a encore practiqué la dessension pour conserver les corps debiles & de facile inflamation : Mais toutes ces choses se font par le feu, comme la calcination, sublimation, & dessension : ou par l'eau, comme la distillation & dissolution. Les manieres & preceptes desquelles sont diffuses en tant de bons livres antiques & modernes que je me deporteray par discretion d'en parler d'avantage, puisque tout mon discours n'y adjoustant rien de nouveau, n'y pourroit apporter ornement ny facilité. Il me suffira seulement de dire ce que j'en sçay en general par forme de diffinition. Assavoir, que la calcination a esté inventee pour les matieres dures & rebelles à cause de leur continuité & forte composition, qui les empesche de recevoir facilement la separation de leurs excremens sans estre divisez par leurs moindres parties. Et de celle cy proviennent quatre utilitez, qui sont le bruslement du soulfre impur & fetide ; la separation plus aysee de la terrestreité superflue, & estrange, La fixation du soulfre interne, & la dissolution plus prompte. Car le naturel du feu est de consommer les parties adustibles qui ne sont de l'essence de la substance : de faciliter la division & rejectement des excremens terrestres : de fixer & affermir le soulfre radical : & de multiplier le sel dans les corps, lequel seul peut apres recevoir la dissolution par l'eau. Or je dy que la calcination tombe seulement sur les corps qui pour leur continuité ceddent à peine : Parce que les esprits ou choses volatiles & legerement fuyantes au feu ne peuvent estre calcinees sans l'adition des choses fixes & dissemblables à leur nature : L'intention ou but de la calcination n'estant autre que de tirer les sels de toutes choses, parce qu'en iceux consiste la meilleure partie & principale vertu secrette des corps ou esprits, esquels est attachee cette adustion corrompante qui pour ce subject se doit en toute sublimation laisser aller & evaporer comme inutile : afin de mieux delivrer des feces terrestres cette moyenne substance qui reste, preparee & acheminee à purification & fixation par l'action du feu.