Sal Lumen and Spiritus Mundi Philosophici

Et si nous voulons quiter les peregrinations lointaines & estranges, & par le conseil de l'oracle finir nos voyages curieux en nous mesme, recherchant bien les causes de nos indispositions & plus fascheuses maladies, nous trouverons qu'elles naissent de ces infectes fumees, qui obscurcissent la lumiere de nostre santé : d'où s'ensuit un apparent indice de ce qui se fait au dedans. Car l'homme sain, à cause de la clairté interne de sa naturelle disposition porte un visage clair, & vivement coloré : Mais le malade, à peine est il frappé du mal qu'il monstre son atteinte en certaine palleur obscure & plombee, qui descolore & ternit le naïf de ce premier teinct. Et tout ce changement procedant seulement des fumees de l'adustion & inflamation du soufre excrementeux, qui s'espandent par tous les membres & les infectent de suye sulfuree, jusqu'en leur superficie, par le moyen des pores qui rendent les corps transperçables. On peut encore dire que cette palleur & descolorement procede aussi de ce que la nature se sentant offencee & assiegee par la maladie, elle fait retirer tout le sang clair & net, au centre de la santé des corps, qui est le cœur, afin d'y r'assembler & joindre toutes ses forces, pour virilement combattre & soustenir les assaux du mal : delaissant à cette occasion l'exterieur despourveu de cette clairté naturelle. Lequel exterieur demeure comme terre mortifié & reduit à decoloration & obscurité : Parce que la terre en laquelle il commence par le mal à se convertir & retourner, est noire de son naturel, ainsi que le feu est clair & candide du sien, comme deux elemens de qualitez contraires. La terre donc de son costé comme espaisse & tenebreuse, donne la noirceur : & l'adustion du soufre comme fuligineux & fumeux obscurcit pareillement. A raison dequoy l'un & l'autre sont causes de corruption, destruction, & gastement en toutes choses. Et n'y a proprement que ces deux qui machinent & pourchassent la ruyne de tout ; pour ce qu'ils sont en tout : & n'y a rien icy bas entre les composez qui en soit exempt, hormis l'or, & les pierres precieuses, que Nature a elabourees à perfection, autant qu'il luy a esté possible. Tellement que la mort est en tous autres corps une hostesse perpetuelle, qu'ils taschent d'introduiser aux choses pour les destruire.