Sal Lumen and Spiritus Mundi Philosophici

Ce sel est donc la derniere matiere qui demeure des corps, & non la cendre de laquelle il est extraict en dernier ressort, & duquel par apres on ne peut plus rien tirer : Car s'il se convertit en eau par l'humidité, cette eau se recongelle en sel par la chaleur. D'où l'on tire la consequence que telle eau estoit le vray Mercure duquel les corps avoient esté premierement créez : & que cette eau estant cachee dans cette cendre l'empesche de se consommer au feu par bruslement : Tout ainsi que le Mercure universel caché dans le sein de la terre avant la production des corps. C'est pourquoy le docte Rouillasque, appelle en ses escrits cette humidité eau de feu mercurielle, parce que le feu l'engendre & la nourrit, voire augmente sa bonté d'autant plus qu'elle demeure en iceluy plus longuement. Car c'est la derniere operation du feu, que de faire du sel : & le sel n'est autre chose qu'une eau seiche ; qui acquiert & conserve son humeur & sa siccité par le feu ; qui necessairement se trouve de nature pareille. Ce que je dis icy afin que l'on ne trouve estrange que j'aye maintenu dés le commencement de ce livre que le feu n'est point sans humeur, de laquelle estant nourry c'est force qu'il en participe, puisque toutes choses doivent estre alimentees de ce dont elles sont faites. Tellement que le feu & l'humeur sont comme deux corelatifs qui ne peuvent seulement estre imaginez l'un sans l'autre. Et sans doute les elemens ont une telle connexion & afinité entr'eux que l'un participe de l'autre : & chacun d'eux se trouve en son compagnon. Car la terre contient son eau, son air, & son feu : L'eau a son feu, son air, & sa terre : L'air a sa terre, son eau, & son feu : Et le feu a son eau, son air, & sa terre. Sans lesquelles participations, il ne se pourroit faire aucune conversion entr'eux : & n'y auroit nulle simpathie ny convenance.