Sal Lumen and Spiritus Mundi Philosophici

Ce que Jesus-Christ mesme a divinement congnu & fait cognoistre, disant que si à l’imitation du grain de froment l’homme ne meurt, il ne peut acquerir la vie incorruptible. Non pas qu’il vueille dire que cette vie se doive acquerir par la mort corporelle, car s’il estoit ainsi le meschant, scelerat, mourant auroit le mesme advantage du juste vertueux: Mais il entend qu’il faut que le vieil homme meure, c’est à dire, que l’homme mortifie & separe de luy la vieille corruption qu’il avoit attiree de la semence de nostre premier pere. Or cette corruption est proprement l’intemperance & excès advenu par le mors de la pomme, depuis lequel l’homme n’a cessé de mourir, parce que deslors la terre & tout ce qu’elle produit d’animaux commencerent à estre infectez du venin de ce trompeur serpent caché parmy les fruicts, c’est à dire les aliments, par la friandise desquels il alache les pauvres humains à s’en souler, & avaler le morceau deffendu auquel leur mort estoit cachee. Et le serpent est le corrupteur que je nomme Satan, parce qu’il rampe sur la terre, & la circuit incessamment, se meslant & glissant en elle, & ce qu’elle produit d’animaux, vegetaux, & mineraux, afin d’empoisonner le monde, & introduire en l’homme la tyrannie de la mort. De cette intemperance & excès de vivre est sortie la privation de vertu, le vice n’estant proprement qu’un banissement de justice, & justice rien plus qu’un temperé desir & continuel progrés au bien. Il faut donc que cette intemperance & excès meurent en nous, d’autant qu’ils engendrent en l’homme toutes sortes de pechez, & l’esguillonnent à malice & meschanceté.