Sal Lumen and Spiritus Mundi Philosophici

Je diray neantmoins en passant (pour ne m'esloigner de mon premier discours) que c'est mal conclu de dire, que puisqu'en ce lieu s'assemblent toutes les influences des Astres, il s'ensuit qu'il y doit avoir une ardeur extreme, ce qu'à la verité je confesserois si le feu des Astres estoit ainsi que le vulgaire, destruisant & consommant, non pas vivifiant, conservant, & nourrissant: car s'il estoit tel qu'on le croit, il y a long temps que non seulement la terre, mais l'univers fust consommé. Ces influences veritablement s'eschauffent dans le sein du vieil Demogorgon; Mais c'est d'une ardeur vitale, & non mortelle, ou destruisante: Laquelle y plante une vertu omniforme, qui par cet eschauffement se dilatte par tout le corps terrestre, estant la premiere cause motrice des generations. Et ne faut penser que la chaleur externe qui provient du Soleil eschauffe seule la terre, & la face engendrer: car nous voyons qu'en hyver, alors que le Soleil est le plus esloigné de nous, le dedans d'icelle est plus chaud qu'au plus ardent de l'esté, comme il s'experimente és puits, fontaines, & caves profondes: De sorte que pendant les plus fortes gelees de l'hyver, les metaux ne laissent à se cuire & endurcir; Et peut on asseurer que c'est lors que se faict leur plus grande cuisson, à cause que la chaleur centralle est reprimee & retenue dans la terre par la froideur de l'air & de l'eau qui l'environnent. Le Soleil remontant au printemps, & s'approchant de son perpendicule sur nous, n'est pas la principale cause de la vegetation des choses: Car si elle dependoit de luy seul, aucun ne doutera que plus il seroit haut & exalté, les vegetations s'iroient augmentant à proportion de la chaleur croissante: ce qui se void tout au contraire. Mais pource qu'un semblable attire volontiers l'autre, & que l'un s'esloignant l'autre se recule & depart aussi, le Soleil par la force aymantine de ses rayons attire & rappelle la chaleur du Soleil centrique, retiree & comprimee en l'interieur de la terre par l'aspre rigueur du froid, laquelle remontant à la superficie redonne la vertu vegetative à toutes choses. Ce n'est donc pas l'externe chaleur du Soleil celeste qui eschauffe le profond de la terre, mais bien celle du Soleil terrestre innee en elle: car il y a deux sortes de chaleur: l'une de reverberation, qui est l'externe; l'autre d'influence & penetration, qui est l'interne, dont j'entens parler: Le naturel de laquelle est de vivifier, augmenter, & conserver, par l'entretien de l'humeur radicale contenue en ce feu duquel j'ay faict mention au precedent chapitre.