Liber II. De crescentibus rerum naturalium.

Calor & humiditas crescentium rerum causa.

Satis manifestum est, & cuilibet notum, quod per caliditatem & humiditatem omnes res naturales crescant & maturentur, quod satis demonstratur ex pluvia & sole consequente. Nemo enim negare potest pluviam terram foecundare, & fatendum est omnibus a sole omnes fructus maturari. Cum igitur iuxta ordinationem divinam hoc naturae postulatio sit, quis repugnabit vel non credet etiam hominem hoc posse per prudentem & solertem suam industriam artis Alchymisticae, ita ut infrugiferum frugiferum, immaturum maturum reddat, & omnia crescere & augeri faciat. Dicit enim scriptura, Deum homini omnia creata subiecisse, & tanquam rem propriam in manus eius tradidisse, ut illis ad suam necessitatem uteretur, ut dominaretur piscibus maris, volucribus coeli & omnibus rebus in terris, nulla re excepta. Quare homo merito gaudere debet, quod Deus ipsum in luce Naturae adeo illustrarit & donarit, ut omnes creaturae Dei ipsi obedire & subditae esse cogantur, & praecipue tota terra, & omnia quae in ea & super ea nascuntur, vivunt & moventur. Quandoquidem igitur oculariter videmus, & quotidiana experientia docemur, quod quo saepius & copiosius pluvia terram humectat, & illam Sol suo calore & fervore iterum exsiccat, eo citius fructus terrae prodeant, & maturentur, etiam omnes fructus ita crescant & augeantur, quodcunque sit tempus anni: nemo deinceps miretur, quod Alchymista quoque multiplicibus imbibitionibus & distillationibus idem facere possit. Quid enim aliud est pluvia quam imbibitio terrae? & calor & aestus Solis, quid est aliud quam distillatio Solis, qui tales humiditates rursus attrahit? Propterea dico possibile esse per talem cooperationem in media hyeme pulcras virentes herbas, flores & alios fructus producere, per terram & aquam, ex semine & radice. Si iam hoc fit in herbis omnibus & floribus, fiet etiam in multis similibus rebus, nempe in omnibus mineris, quarum imperfecta metalla per aquam mineralem maturari possunt per Alchymistae solertis industriam & artem. Similiter possunt omnes Marcasitae, Granati, Zineta, Arsenica, Talka, Cachymiae, Bisemuta, Antimonia, &c. quae omnia immaturum ☉ & ☽ secum vehunt, ita maturari, ut ditissimis auri & argenti venis aequari possint, tantum per talem cooperationem, &c. Ita etiam Elixir & Tincturae metallorum maturantur & perficiuntur.

Artificiosa rerum maturatio.

Homini a Deo omnia subiecta.

Generatio artificialis fructuum.

Maturatio minerarum.

Barba & ungues nascuntur in mortuis.

Cum igitur ut dictum est, humiditas & caliditas omnia maturent & crescere faciant, nemo miretur, quod homini malefico in patibulo aut rota post longum tempus, barba, capilli, & ungues nascantur, neque pro signo innocentiae ipsius habeatur, ut imperiti iudicant, hoc enim naturale est, & ex naturalibus causis fluit. Nam dum humiditas in homine est, crescunt ipsi ungues, barba & capilli: & quod maius est, homini sepulto in terra ipsa nascuntur ungues, barba & capilli, usque ad secundum annum vel usque ad putrefactionem ipsius, &c.

Sciendum etiam est multas res in perpetuum crescere & augeri in magnitudine, pondere & virtute, in aqua & terra, in quibus etiam bona & efficacia permanent, ut sunt metalla, marcasitae, cachymiae, talka, granati, antimonium, Bisemuta, gemmae, perlae, coralii, omnes lapides & argillae. Ita etiam effici potest, ut ☉ crescat & augeatur in pondere & corpore, si tantum modo in terra Orientem spectante sepeliatur, & semper recenti urina hominis & stercore columbino foecundetur.

☉ Augmentatio.

Auri generatio in cucurbita ut fiat.

Quomodo fiat arbor philosophorum.