Iovi.

Veneri.

Saturno.

Ut autem ex addito exemplo me planius intelligatis: scire vos velim, Planetae Soli subiici Coronam, Sceptrum, Solium, omnemque regiam potestatem & maiestatem, omnem dominationem, omnes divitias, thesauros, ornatus & apparatus huius mundi. Lunae Planetae subiecta sunt, omnis agricultura, navigatio, peregrinatio & peregrinatores, & quae alia huc spectant. Planetae Marti subiiciuntur, Munitiones (ut vocant) omnes, bracteae, Loricae, tormenta, hastilia, denique omnia arma, & quae ad bellum pertinent. Planetae Mercurio subiiciuntur omnes literati, omnia instrumenta Mechanica, & quae ad artes requiruntur. Planetae Iovi subiiciuntur omnia iudicia & iura, ordo universus Leviticus, omnes Ecclesiarum ministri, templorum ornatus, clenodia, & si qua alia huius classis sunt. Planetae Veneri subiiciuntur, quaecunque ad Musicam referuntur, Musica instrumenta, & exercitia venerea, amores, scortationes, &c. Planetae Saturno subiiciuntur, quicunque in & infra terram operantur, ut metallarii, cunicularii, Vespillones, fontium effossores, velut & omnia his familiaria instrumenta, &c.

Pyromantia qualia signa.

Pyromantia signa sua per Astra Ignis promit, in igni communi, per singulares scintillas, flammas, crepitus, &c. In fodinis per coruscationes: in firmamento, per Stellas, Cometas, & fulgur, & fulmen, & Nostoch ac similia: in spectris per Salamandrinos, Ethnicos & similes spiritus, ignis specie apparentes.

Hydrom. qualia signa.

Hydromantia signa sua dat per astra aquae, per fluctus, exundationes, defectus, decolorationes, Lorindos, nova fluenta, rerum terrenarum ablutiones: In Magica & Nigromantia per Nymphas, visiones, & monstra supernaturalia in aquis & mari.

Chaomant. signa qualia.

Chaomantia signa sua exhibet per astra, aeris & venti, per discolorationem, perditionem & vastationem omnium tenerarum & subolium rerum, quibus ventus adversus est, excutiendo & denudando flores, folia, frondes, caules. Si astra chaomantiae moventur, Necrocomicae ex superiore aere decidunt, & frequenter voces ac responsa audiuntur: Item arbores cum radicibus ex terra evelluntur, & aedes prosternuntur. Conspiciuntur Lemures, Penates, Undenae, Sylvani, &c. Sic etiam Tereniabin, Tronossia, & Manna, super arbores & herbas decidit.

Necromantia signa sua promit per astra mortis, quae nos etiam Euestra vocamus, signantia corpus aegroti & moribundi hominis, maculis rubeis, lividis & purpureis, quae certa mortis, tertia die insulturae, indicia sunt. Signant etiam hominum manus & digitos maculis luteis, quae certa signa fortunae instantis sunt, sive bona ea sive mala sit. Quando ergo Necromantiae Astra moventur, tunc mortui miracula & signa edunt, & defuncti cruentant, res mortuae conspiciuntur, &c. voces ex sepulcris audiuntur: tumultus & trepidationes in Ossoriis surgunt, & mortui viventium forma & habitu apparent, & conspiciuntur in visionibus, speculis, Berillis, lapidibus & undis, specie varia: Evestrum & Trarames signa dant pulsando, percutiendo, tundendo, cadendo, iaciendo, &c. Ubi tumultus seu sonus tantum auditur, sed nihil videtur: quae omnia certa sunt indicia mortis, praesagientia ipsam ei, cuius habitu apparent, aut quo loco audiuntur, &c.

De his signatis praeter iam dicta multa adhuc recenseri possent. Sed cum illa, malas, damnosas & periculosas phantasias, Imaginationes, & superstitiones secum afferant, quae non infortunii tantum, sed etiam mortis caussa fieri possent: ea silentio transilimus. Revelari enim nobis prohibita sunt, cum ad arcanam scholam & potestatem divinam pertineant. Iam ergo libello huic colophonem imponamus.