Dentes equi, &c.

Signator idem cervi cornua signat ramis, ex quibus aetas eiusdem cognoscitur. Quot enim cornu ramos habet: tot annos cervus natus est. Cumque quotannis novi unius cornu accessio fiat: cervi aetas ad20.aut30.annum dignosci potest. Sic & Signator vaccae cornua circulis notat, ex quibus, quot vitulos gestarit, cognoscitur. Quilibet enim circulus vitulum unum indicat. Idem Signator primos dentes equi extrudit, ut primis septenis annis illius aetas ex dentibus certo cognosci queat. Primum enim equo nato14.dentes enascuntur, de quibus quotannis geminos perdit. Et sic septem annorum decursu universi excidunt. Hac de caussa etiam septimum annum egressus equus, non nisi a peritissimo & exercitatissimo cognosci potest.

Rostrum & ungues, &c. avis.

Idem Signator signat volucris rostrum & ungues peculiaribus signis, ut auceps peritus quivis annos & aetatem illius ex illis censeri queat. Idem Signator aegrorum porcorum linguas exanthematis notat, ex quibus impuritas eorum cognoscitur. Et velut impura lingua est, ita & in universum corpus. Idem Signator coloribus discretis nubes signat, ex quibus tempestates coeli praenosci possunt. Sic etiam Lunae circulum distinctis coloribus, quorum quilibet peculiaris interpretationis est, signat. Sic rubedo plerunque futurum ventum indicat. Viriditas, nigredoque, pluviam. Haec duo commixta, ventum cum pluvia: quod in mari signum est, cum plerunque saevas tempestates & procellas portendat. Claror & candor lucidus bonum signum est, cumprimis in Oceano. Plerunque enim tempestatem placidam, quietam & serenam praesagit. Quicquid ergo suis signis ita Luna portendit, id sequenti die eventurum est.

Astronomiae Magicae species quae.

Et haec hactenus de signis Naturalibus tradita sint. Quantum vero porro ad supernaturalia attinet, ea res singularis scientiae & experientiae est, velut est Astronomia Magica, &c. & similes. Hic opus est, in illis certam scientiam comparari. Hinc enim multae aliae quoque artes prodeunt, ut Geomantia, Pyromantia, Hydromantia, Chaomantia, & Necromantia, quarum quaelibet sua peculiaria astra habet, quae astra modo supernaturali ita signant. Et sciendum est, astra Geomantiae signa sua signare seu imprimere in terrena corpora universi orbis, multis quidem ac variis modis. Nam & terram mutant, & terraemotus, ac hiatus pariunt, gignunt colles & valles, multa nova crescentia parturiunt, proferunt Gamaheos nudis figuris & imaginibus, insignes vires & potentias habentes, quas quidem a septem Planetis accipiunt, non secus ac orbis seu scopus glandem aut telum accipit a iaculatore. Quomodo vero signa ea & imagines Gamaheorum seorsim cognosci, & quid Magice notent, sciri queant: magnae experientiae & Naturae rerum cognitionis id opus est, quod quidem perfecte hic tradi nulla ratione potest.

Gamaheorum vis unde & qualis.

Hoc autem probe notandum est, quod lapis seu Gamaheus quilibet non nisi unius Planetae proprietate & virtute pollere, adeoque ab uno saltem Planeta dotari possit. Et licet quidem duo pluresve Planetae in terrenis corporibus, velut in superiore Firmamento coniungantur: unus tamen ab altero opprimitur. Sicut enim una domus geminos dominos minime fert, sed alter alterum extrudit: ita hic quoque. Unus manet dominus: alter servit. Aut, quemadmodum custodientem domum quandam, superveniens alius, per vim eiicit, & se dominum constituit, omnia pro nutu & arbitrio suo disponens, altero interim ad servitia redacto: sic etiam astrum unum expellit alterum, unus Planeta alterum, unus Ascendens alterum, una Influentia alteram, una Impressio alteram, unum Elementum alterum. Sicut enim aqua ignem exstinguit: ita Planeta unus alterius proprietatem elidit, & suam invehit. Idem eodem modo etiam de eorum signis intelligendum est, quae multiplicia sunt, & non Characteres tantum, veluti multi arbitrantur, sed universa ea, quae in tota Mappa Planetarum inveniuntur, hoc est, quaecunque Planetis illis cognata & subiecta sunt.

Subiecta quae sint SOLI.

LUNAE.

MARTI.

Mercurio.