Denique vero in fine rerum terrenarum omnium fiet ultima separatio, in tertia generatione, die illa magna, qua filius Dei in Maiestate & gloria sua venturus est, cui praeferentur non gladii, vincula, Diademata, Sceptra, &c. & thesauri seu clenodia regia alia, qualibus principes, Reges, Caesares, &c. sese pompose inferunt: Sed crux eius & corona spinea, & clavi per manus ac pedes traiecti, & hasta, qua latus eius perfossum est, & arundo ac spongia, quibus potum ei porrexerunt, & virgae, quibus percussus & caesus est. Hunc nulla equitum turma tympanis late clangentibus comitabitur: Sed quatuor tubae ab Angelis versus quatuor mundi partes inflabuntur, sonitu suo fremebundo omnes in vivis adhuc exsistentes, uno momento occisurae, & hos iterum una cum defunctis sepultis confestim resuscitaturae.

Matthaeus 25.

Audietur enim vox, Surgite mortui, & venite ad iudicium. Ad hoc duodecim Apostoli considebunt, sellis ex nubibus paratis, & duodecim Israelis familias iudicabunt. Eo loco Sancti Angeli malos a bonis, maledictos a benedictis, hoedos ab ovibus separabunt. Ibi maledicti instar lapidum & plumbi deorsum praecipitabuntur: benedicti autem velut Aquilae sursum volabunt. Ibi a tribunali Dei ad stantes in laeva parte egredietur talis vox: Abite maledicti in ignem aeternum, quod Sathanae ac Diabolis ab aeterno paratum est. Nam esurii, & vos me non cibastis, sitivi, & potum mihi non porrexistis. Aeger fui, & captivus, & nudus, & vos me non visitastis, non liberastis, non vestivistis, denique nulla erga me misericordia tacti estis. Ideo nec hic ullam misericordiam experiemini. Econtra ad stantes in dextra parte sic loquetur: Venite benedicti & electi in regnum mei patris, quod vobis & omnibus angelis ab initio paratum est. Esurivi enim & dedistis mihi manducare, sitivi & dedistis mihi bibere. Hospes eram, & collegistis me. Nudus eram, & operuistis me, infirmus eram, & visitastis me: in carcere eram, & venistis ad me. Ideo & vos iam in domum patris mei recipiam, in qua multae sanctorum habitationes sunt. Miserati me estis: ideo & ego vos miserabor.

His omnibus completis & exactis, res Elementares universae ad primam materiam Elementorum redibunt, & in aeternum torquebuntur, nec unquam consumentur, &c. Econtra sacramentales creaturae omnes redibunt ad primam materiam sacramentorum, hoc est, clarificabuntur, & in aeterno gaudio Deum creatorem suum glorificabunt & venerabuntur, a mundo ad mundum, ab aeterno ad aeternum. Amen.

FINIS LIBRI OCTAVI.