Resuscitatio autem vel restauratio Mercurii coagulati fit per Retortarum distillationes: nam solus Mercurius vivus ascendit in aquam frigidam & relinquitur cinis ♄, ♀, vel sulphuris. Resuscitatio autem & restauratio Mercurii sublimati fit in aqua ferventi: attamen oportet eum prius minutissime teri, ita aqua fervens ab ipso resolvet spiritum salis & vitrioli, quem in sublimatione secum attulit, & Mercurius concurrit rursum vivus in fundo aquae. Si iam talis Mercurius denuo cum novo sale & vitriolo sublimetur, & in aqua ferventi resuscitetur, & hoc septies vel novies fiat, melius purgari & renovari nequit. Et hoc pro magno Secreto retine in Alchymia & Medicina, & de eo gaude summopere. Nam hoc modo aufertur a Mercurio omnis impuritas & nigredo ac venenositas. Resuscitatio & restauratio Mercurii calcinati sine sublimatione fieri non potest: nam nisi post calcinationem sublimetur, nunquam revivificabitur, quare eum sublimabis, & postea ut alium sublimatum, reduces.

Mercurii sublimati reductio & purgatio summa.

Calcinati & praecipitati.

Resuscitatio cinnaberis lazurii, Auri musici, etiam praecipitati, ut vivificentur iterum in Mercurium vivum, est talis: Recipe horum quodvis, minutissime tere in marmore, & impasta albumine ovorum & smegmate, postea fac pilulas magnitudine avellanae, quas pone in firma cucurbita terrea: ad orificium eius pone laminam ferream quae multa parva foramina habeat, sitque luto agglutinata, atque distilla per descensum igne forti, ita ut cadat in aquam frigidam, & habebis iterum Mercurium vivum.

Instauratio ligni combusti.

Resuscitatio autem & restauratio ligni est difficilis & ardua, attamen naturae possibilis, sed sine insigni solertia & industria fieri nequit. Ut autem revivificetur, tali maxime modo id fit: Recipe lignum quod primum fuerit carbo, postea cinis, & pone in cucurbita, una cum resina, liquore & oleitate illius arboris, omnium sit idem pondus, misceantur, & in leni calore liquefiant, & fiet mucilaginosa materia, atque ita habes tria principia simul, ex quibus scilicet omnia nascuntur & generantur, nempe phlegma, pinguedinem & cinerem. Phlegma est Mercurius, pinguedo est sulphur, cinis est sal. Nam omne quod igni fumat & evaporat, est Mercurius: quod flagrat & comburitur, est sulphur, & omnis cinis est sal. Cum iam ista tria principia simul habes, pone ea in ventre equino & putrefac ad suum tempus. Si postea illa materia in pingue solum sepeliatur vel infundatur, videbis eam reviviscere & arborem vel lignum parvum inde nasci, quod quidem in sua virtute multo est nobilius priore. Hoc vero lignum est & vocatur resuscitatum lignum, & renovatum, & restauratum, quod ab initio quoque lignum fuit, sed mortificatum, destructum, & in carbones & cineres & in nihilum redactum, & tamen ex illo nihilo aliquid factum & renatum est. Hoc sane in Luce Naturae magnum est Mysterium, nempe quod res, quae formam suam plane amiserat & in nihilum redacta fuerat, eam recuperet, & ex nihilo aliquid fiat, quod postea multo nobilius sit in sua virtute & efficacia quam primo fuerat.

Ligni phlegma est ipsius Mercurius: pinguedo sulphur: cinis sal.

Generalis ratio resuscitandi.

Ut autem generaliter de resuscitatione & restauratione rerum naturalium loquamur, sciendum est, praecipuum hic fundamentum esse, ut cuilibet rei reddatur cumque ea concordetur, iterum id, quod ei in mortificatione ademtum fuerat & ab eo separatum, quod difficulter hic specifice explicari potest. Quare hunc libellum concludemus, & in libro sequenti de transmutationibus rerum naturalium latius haec declarabimus.