Resuscitatio mortuae avis.

Hominis generatio Spagyrica.

Hominis generatio per bruta.

Possibile etiam est naturae homines nasci ex animalibus, & hoc habet causas naturales, sed tamen sine impietate & haeresi id fieri nequit: nempe si homo commisceatur animali, & illud animal ut foemina sperma viri cum appetitu & libidine in suam matricem receperit, conceperit, & concluserit: tunc sperma necessario putrescit, & per continuum calorem corporis rursum homo & non animal inde nascitur. Nam semper quale est semen seminatum, talis etiam fructus inde nascitur, & nisi hoc fieret, contra naturalem lucem, & contra Philosophiam fieret. Quare quale semen est, talis herba nascitur inde. Ita ex semine cepae rursum gignitur cepa, non rosa, non nux, non lactuca, &c. Ita ex farre nascitur far, ex hordeo hordeum, ex avena avena. Ita fit & cum omnibus aliis fructibus, qui semen habent & seminantur, &c.

Semen quale, talis fructus.

Imaginatio muliebris quid possit.

Similiter etiam est possibile, & non contra naturam, ex muliere & viro nasci animal irrationale. Neque est hic de muliere iudicandum ut de viro, hoc est, non propterea debet haberi pro haeretica, quasi contra naturam egisset, sed imaginationi ipsius, id est tribuendum. Nam imaginatio ipsius est saepissime in causa. Et praegnantis mulieris imaginatio est tam efficax, ut in concipiendo semen in corpus suum, foetum variis viis transmutare possit: quoniam astra ipsius interiora tam fortiter diriguntur in foetum, ut pariant Impressionem & Influentiam. Quare infans in utero materno in formatione sua positus est in manu & voluntate matris suae, sicut argilla in manu figuli, qui inde format & facit quod vult, & ipsi libet: ita mulier praegnans format fructum in corpore suo iuxta suam imaginationem, prout astra ipsius sunt. Ergo saepe accidit, ut ex semine virili pecudes aut alia horrenda monstra gignantur, prout imaginatio matris fortiter in embrionem dirigitur, &c.

Sicut autem iam audivistis per putrefactionem multas & varias res generari & vivificari, ita etiam sciendum est, quod ex multis herbis per putrefactionem varia nascantur animalia, quod harum rerum periti sciunt. Hic quoque sciendum est, quod talia animalia quae in & ex putrefactione nascuntur & fiunt, omnia aliquid veneni contineant, & venenosa sint, attamen unum longe plus & efficacius altero, & unum alia forma quam alterum, ut videtis in serpentibus, viperis, bufonibus, ranis, scorpionibus, basiliscis, araneis, apibus sylvestribus, formicis, multiplicibus vermibus, ut erucis, muscis, bruchis, &c. quae omnia in & ex putrefactione nascuntur. Nascuntur etiam multa monstra inter animalia. Sunt autem & monstra illa, quae non per se ex putrefactione nascuntur, sed per artem fiunt in vitro, ut dictum est, quia illae saepissime in valde mirabili specie & horrenda aspectu forma apparent, ut saepe cum multis capitibus, multis pedibus, multis caudis, multis coloribus, saepe vermes cum caudis piscium, vel pennis praediti, & alia insueta forma, ita ut similes visi non sint. Propterea non solum omnia animalia, quae parentes non habent & ex sibi similibus non nascuntur monstra sunt, sed etiam quae ex aliis rebus nascuntur.

Animalia ex putrefactione orta omnia venenosa.

Monstra quae & qualia sint.

Basilisci generatio artificialis.

Basilisci venenum incertissimum.