Arsenicalium, auripigmenti, opermenti, realgaris & similium materiarum vita est minerale & coagulatum venenum.

Stercoris, &c. vita quid.

Vita undosorum, hoc est, omnis stercoris hominum & animalium, est ipsorum gravis & foetens odor. Nam hoc amisso mortua sunt.

Aromaticorum vita quid.

Rerum aromaticarum vita, quales sunt muscus, ambra, zibetra, & quicquid fortem odorem, bonum & suavem praebet, est nihil aliud quam odor ipse gratus: nam si hunc amittant sunt res mortuae & inutiles.

Vita dulcium quid.

Vita rerum dulcedinosarum ut sacchari, mellis, mannae, fistulae cassiae & similium, est tingens & subtilis dulcedo: nam si ipsis ista dulcedo distillando vel sublimando adimatur, sunt res mortuae & fatuae, quae nihil amplius valent.

Vita Resinarum quid.

Vita vero Resinarum ut carabae, terebinthinae, gummi, est mucilaginosa, nitens pinguedo, quae omnia egregiam vernicem dant, cum autem vernicem non amplius praebent, & nitorem suum amittunt, mortuae sunt.

Vita Herbarum quid.

Herbarum, radicum, pomorum, & aliorum eiusmodi fructuum vita nihil aliud est quam liquor terrae, quem sponte amittunt, si tantum carent aqua & terra.

Vita Lignorum quid.